Der allmechtig
Gott/ hat sich aus
großer Barmhertzigkeit gegen den Menschen/ vmb seines lieben Sons
willen/ für
vnd für mit gewissen Zeugnussen geoffenbaret/ vnd seine gnedige
Verheissungen
geben/ Vnd hat diese seine Offenbarungen/ vnd seine Lere durch die
Propheten
vnd Aposteln in gewisse Schrifften fassen lassen. Er hat auch selbs die
Zehen
Gebot in steinern Taffeln geschrieben/ Und hat geboten/ das man der
Propheten
vnd Aposteln Bücher lesen vnd lernen sol/ Ja wir sind also daran
gebunden/ das
keine Kirchen Gottes ist/ wo nicht diese einige Lere/ die in der
Propheten vnd
Aposteln Büchern gefasset ist/ bekannt vnd angenomen ist/ vnd für vnd
für
andern fürtragen vnd verkündiget wird.
So man nu aus
den selbigen
Büchern die Lere lernen muß/ so ist hoch nötig/ das etliche sind/ die
lesen
können/ Vnd wer andere vnterrichten sol/ der mus selbs zuuor bey sich
ein
ordentliche Summa der gantzen Lere haben/ vnd wissen/ wo vnd wie alle
Artikel
in Göttlicher Schrifft nach einander gegründet vnd erkleret sind.
Vnd damit man
gewis sey vom
verstand Göttlicher Schrifft/ müssen viel sein/ die der Propheten vnd
Apostel
Sprache verstehen/ vnd vom gründlichen verstand bericht thun/ vnd
zeugnus geben
können.
Vnd in Summa/
wer ander Leut
recht vnd ordenlich vnterweisen sol/ der mus gerüst sein mit löblichen
Künsten/
die zu solchem Werck dienstlich sind.
Vnd ist vom
lesen ausdrücklich
geboten/ 1.Tim. 4. Du solt anhalten mit Lesen/ Trösten vnd Leren/ In
welchem
Spruch das Lesen nicht vergeblich am ersten genennet ist. Denn das
Euangelium
ist gantz weit vnterschieden/ von allen andern Künsten/ Religion vnd
Secten.
Andere Künste werden angefangen aus natürlichem Verstand/ Als Zelen/
Messen/
Wenn [Bl.148r] sogleich nicht in
Schrifft gefasset weren/ Aber die Göttliche verheissung von der Gnade/
ist
nicht ein Liecht das vns angeboren sey/ wie zelen/ oder Gesetz lere/
Sondern
ist ein wunderbarlicher Rath Gottes/ vber vnd ausser aller Creaturen
verstand/
vnd ist besonder geoffenbaret/ vnd durch die Propheten/ vnd hernach
durch die
Aposteln in Schrifft gefasset/ Darumb ist der anfang der Christlichen
Lere vom
Lesen.
Vnd 2.Pet. 1.
Ist also
geschrieben/ Ir thut recht daran/ das jr vleis thut in der Propheten
Schrifft/
vnd euch daran haltet/ als zum Liecht im Finstern etc.
Paulus zun
Galatern/ So jemand
ein ander Euangelium predigt/ denn ich gepredigt habe/ der sey
verflucht. Nu
hat Paulus seine Lere selbs in Schrifft gefasset/ die mus man lesen vnd
betrachten/ sol man wissen was seine Lere ist.
Aus diesen vnd
viel andern
Sprüchen/ ist öffentlich/ das Gottes ernster wille ist/ das etliche
Menschen
sind/ die im Lesen/ Schreiben/ Sprachen/ Künsten/ andere vnterweisen/
vnd
etliche besondere Zuhörer/ die lernen/ vnd zu erhaltung der Bücher/
Sprachen/
vnd Christlicher Lere vnd Künsten dienen.
Vnd ist dieses
den Lerern vnd vnd
Zuhörerern tröstlich/ das sie wissen/ das diese jr erbeit von Gott
geboten/ vnd
Gott gefellig ist/ vnd das Gott dabey sein wölle/ Wil Verstand vnd
Gnade geben/
vnd will auch sonst für sie sorgen/ wie er spricht zu den Leuiten/ Ich
bin ewer
Erbe etc.
Gott hat auch
alle zeit diese weise
erhalten/ das bey den fürnemesten Kirchen ehrliche Schulen gewesen
sind/ als
bey dem Tabernackel in Israel/ vnd hernach zu Antiochia/ Alexandria
etc. vnd
ist der Apostel Johannes selbs ein Legent gewesen/ darnach Polycarpus/
Ireneus
vnd andere.
[Bl.
148v]Diese erinnerung sol man dem Volck offt fürhalten/
Gottesfürchtige Leute zu ermanen/ das sie jre Kinder gerne lernen
lassen/ vnd
freude daran haben/ So die Kinder in Christlicher lere vnd Zucht
aufferzogen
werden/vnd zu den Kirchen gewehnet/ vnd in der Heiligen versamlung
helffen Gott
preisen vnd anruffen/ Deren viel hernach zum Predigampt/ vnd zu andern
ehrlichen/ nötigen Emptern in Christlicher Regierung seliglich dienen/
Dazu die
Eltern jre kinder auffzuziehen/ so viel jnen müglich ist/ schuldig
sind/ Wie zu
Tito geschrieben ist. Die Vnsern sollen lernen/ das sie zur Regierung
in guten
Wercken tüchtig sind. Item zu den Ephesern/ Jr Veter solt ewre Kinder
auffziehen in Göttlicher Zucht/ vnd vnterweisung.
Nach dem nu
alle Verstendige
wissen/ das nicht allein Kinderschulen/ darin man die Latinische
Grammatica vnd
Catechismum lernen mus/ nötig sind/ Sondern man mus auch die Sprachen/
Ebreische vnd Griechische erhalten/ Item für die gewachsenen/ der
Propheten vnd
Aposteln Schrifft auslegen/ Item Historien vnd Mathematica zum Calender
wissen.
Dieses alles mus man im Kirchen Regiment haben/ so bedarf man auch
sonst zum
Menschlichen Leben den schönen Schatz von Ertzney/ die Gott dem
Menschen zu gut
geschaffen hat/ dauon man nichts wüste/ wenn Gott nicht auch etliche
erweckt
hette/ die für die Nachkomen gearbeit/ vnd die Lere dauon in Bücher
gefasset
hetten.
Weiter ist auch
Gottes wille/ das
man in Landen vernünftige gewisse/ Recht habe/ Darumb hat der
hochlöbliche
Keiser Lotharius die alten wolgeschriebnen Römische Recht/ widerumb
zubrauchen/
vnd zu lesen geboten.
Zu diesen jetzt
genanten
Sprachen/ vnd Künsten/ sind auch besondere löbliche Schulen/ für die
gewachsnen
nötig/ die nennet man Vniuersiteten. Derhalben wöllen wir vnsere
Vnterthanen
vnd angehörigen/ beuorab diejenige/ so von Gott dem Allmechtigen mit
zimlicher
narung begabt sind/ hiemit zum vlessigsten erinnert [Bl.
149r] / vnd ermanet haben/ das sie jre Kinder/ so darzu
tüglich/ vnd gelernige Ingenia haben/ nicht allein zu der Kinderschul
mit vleis
ziehen vnd anweisen/ Sondern auch dieselbige/ von den sondere hoffnung
ist/ mit
der zeit auff bewerte Gottselige Vniuersiteten schicken/ vnd daran
sein/ das
sie in Christlicher heilsamer Lere/ vnd andern guten Künsten vnd
Faculteten/ jnen
selbs/ vnd andern zu nutz auffwachsen/ vnd ein jeder nach seinem
beruff/ nach
dem jm Gott Gnade vnd verstand verliehen/ zu nötigen Emptern vnd
sachen/
gebraucht werden möge.
Nach dem wir
auch vor dieser zeit
etliche der vnsern auff ChristlicheVniuersiteten befürdert/ vnd jnen zu
jrem
fürnemen hülff thun lassen/ vnd noch thun/ So wöllen wir gleicher
gestalt
fürder daran sein/ das in diesem fall diejenige/ welche für andern von
Gott mit
züchtigen/ vnd gelernigen Ingenijs begabet sind/ vnd hülff bedürffen/
je nach
gestalt vnd gelegenheit der sachen/ so viel müglich/ aus den vbrigen
Kirchen
gütern/ vnd andern Gefellen/ so on das zu milten Wercken gestifftet
sein
versehen/ vnd bedacht werden.
Doch ist hiemit
vnser ernstlicher
wille/ vnd meinung/ das vnsere verordnete Stathalter/ Rethe/ vnd
Amptleute/
auch andere Befelhaber/ an allen orten ein vleissigs/ getrewes
auffsehen/ das
solche Stipendia nicht anders/ denn nützlich angewendet/ Auch niemand
der zu dem studiren vntüchtig/
oder sonst eines vnerbarn wesens/ vnd wandels ist/ aus gunst/ oder
andern
vrsachen/ dazu gefürdert/ oder zu vnserer befürderung an geben/
sondern
hierin allein Gottes Ehre/ nutz vnd wolfart der Kirchen/ auch
Christenlicher
Regiment/ Land vnd Leute/ gesucht vnd betrachtet werde.
Es sollen auch
diejenige/ denen
aus den Kirchen/ vnd von vns dergestalt hülff geschicht/ zuuor/ vnd ehe
sie
dazu gelassen/jrer sitten/ leben/ vnd wandels zeugnus haben/ auch der
Lere
halben/ ob sie zum studiren geschickt/ vnd qualificirt sind/ Von denen/
so wir
jederzeit dazu verordnen/ notdürfftiglich verhört vnd Examiniret werden.
Gleichergestalt/
wenn sie schon auff die Vniuersiteten/ vnd Schulen
verschickt/ wöllen wir jres lebens/ wandels vnd studirens halben/
jederzeit
erkündigung thun/ auch sie jeder weil zur gelegenheit erfordern/ vnd
Examiniren
lassen/ damit der Kirchen Allmosen/ dauon sie erhaltung haben/ nicht
vergeblich
vnd vnnützlich verschwendet werde.
[Bl.149v]
Wie es aber
in den Kinder schulen sol gehalten werden/
dauon sol zu jeder zeit in der Visitation ernstlicher befelh geschehen.
Die weil aber
offt newe Schulmeister
angenommen werden/vnd etlich lust haben zu verenderungen vnd zu
vngleicheit/
vnd aber mancherley verenderung/ vnd vngleicheit/ den Kindern
verhinderung im
lernen bringen/ vnd sonst mancherley vnrichtigkeit daraus folget/ Ist
bedacht/
das durchaus in gemein vngefehrlich diese folgende Form/ in
Kinderschulen sol
gehalten werden. Doch sol in den visitationen die gelegenheit in allen
Stedten/
vnd Flecken bedacht/ vnd bewogen werden.
Von den
Kinderschulen.
Erstlich sollen
die Kinder
ordenlich in drey/ oder vier heufflein/ nach gelegenheit geteilet
werden.
Das
erste heufflein/ sind die Jüngsten/ die anfahen die Buchstaben
zu kennen/ vnd lernen lesen/ die sollen erstlich die gewönliche
Handbüchlein
lernen/ darin das Alphabet/ Oratio Domica, Symbolum, Decalogus, zusamen
gedruckt sein/ vnd sollen im anfang den Kindern nicht andere Bücher
fürgegeben
werden.
Hernach sol man
jnen den Donat/
vnd Cato zusamen fürgeben/ also/ das der Schulmeister teglich ein/ oder
zwen
Vers exponire/ welche die Kinder hernach zu einer andern stund
auffsagen/ das
sie also anfahen etliche Lateinische wörter zukennen/vnd vorrath
schaffen/ die
lateinische Sprach zu reden / vnd ist nützlich/ das sie den Donat vnd
Cato/
nicht allein einmal lesen/ sondern auch das ander mal.
Dabey sol man
sie lernen
schreiben/ vnd ernstlich dazu halten/ das sie teglich jre Schrifft dem
Schulmeister weisen.
Item/ damit sie
desto mehr
lateinischer Wort erlernen/ sol man jnen teglich am Abend zwey
lateinische
wörter zu lernen fürgeben/ die sie behalten/ vnd morgens dem
Schulmeister
auffsagen sollen/ vnd sollen sie in besondere Büchlein schreiben oder
schreiben
lassen/ Als Deus Gott/ Coelum Himel/ etc.
[Bl.150r]Diese
Kinder sollen auch zur Musica gehalten werden/ vnd
mit den andern singen/ wie hernach angezeigt wird.
Das
ander heufflein/ Sind Kinder/ die nu im Lesen gewis sind/ vnd
die Regulas Grammatices anfahen.
Teglich sol man
die erste stunde
nach Mittage/ alle Knaben in der Musica vben.
Hernach sol man
diesem heufflein/
das lesen kann/ welches mag genennet werden/ Secunda Classis/ die zwen
tage/
Montag/ vnd Dienstag/ Fabulas Aesopi exponiren/ welche Joachimus
Camerarius
Lateinisch gemacht hat. Vnd soll der Schulmeister nach gelegenheit der
Knaben/
welche er will/ mag auch etliche liebliche Colloquia Erasmi lesen/ vnd
Erasmi
Büchlein De ciuilitate morum,
Vnd das
Büchlein Joachimi Camerarij/ welches Tittel ist/ Praecepta
morum &c. Aber Aesopus sol nicht gantz aus der Schul komen.
Den Donnerstag
vnd Freitag/ sol
man diesem heufflein Terentium exponiren/ den sollen die Knaben von
wort zu
wort auswendig lernen/ Darumb sol man nicht viel auff einmal fürgeben.
Am Abend/ sol
man diesen Knaben/ so sie zu Hause gehen/ ein nützlichen Spruch
fürschreiben/
vnd exponiren/ den sie alsbald in ein sonder Büchlein schreiben/ vnd
daheim
lernen exponiren/ vnd gedencken/ das sie jn morgens auffsagen. Als Timor Domini initium Sapientiae,
Omnibus in rebus
modus est pulcherrima uirtus, vnd dergleichen.
Morgens frü/
sollen diese Knaben/ so viel in Aesopo oder Terentio gehöret haben/
widerumb
auffsagen/ Vnd sol der Preceptor etliche Nomina decliniren lassen/ vnd
Verba
coniugiren/ nach gelegenheit der Kinder viel oder wenig/ Vnd sol die
Regeln/ De
Generibus/ Casibus/ Preteritis/ vnd Supinis vleissig fordern.
So auch die
Kinder Regulas Constructionum gelernet haben/ sol er die Constructio
vnd die Regeln
dauon fordern.
[Bl.150 v.] Die andere stunde vor Mittage/ sol
die vier tage in der Wochen/
Montag/ Dienstag/ Donnerstag/ Freitag/ alle zeit also gebrauchet
werden/ Das
denn die Knaben erstlich ein stück in Etymologia auswendig recitiren/
darnach
sol der Preceptor dieselbige Regeln mit Exempeln erkleren.
Vnd so sie die
Etymologiam gelernet haben/ sollen sie hernach Syntaxim/ diese stunde
auch also
auswendig recitiren vnd sol der Preceptor hernach dieselbigen Regeln
mit
Exemplis erkleren/ vnd die Knaben deutsch fragen/ das sie Exempla
latina auff
die Regeln in Syntaxi machen/ Als/ wie sol man in Latein sprechen/
Straffe
folget gewislich nach verachtung Göttlicher Gebot/ Poena comitatur
certo
contemptum diuinarum Legum.
Vnd sollen in
allweg die Schulmeister diesen vleis thun/ das sie die Jugent treiben
Regulas
Grammatice auswendig zu lernen/ vnd sol diese Torheit nicht geduldet
werden/
das etliche die Regeln verachten wöllen/ vnd die Sprache on Regeln
lernen.
Auch ist
nützlich das im gantzen Lande/ eine gleiche Grammatica/ Etymologia/ vnd
Syntaxis/ vnd nicht mancherley gebraucht werden/ Nemlich Philippi
Melanthonis/
wie denn die Schulmeister in vnserm Fürstenthumb/ dieselbige vnd kein
andere
der Jugent fürlesen sollen.
Den Mitwoch
vnd Sambstag/ sol man zum Catechismo brauchen/ durchaus in allen
hauffen/ Vnd
sollen die Preceptores jeden Jungen nach einander hören/ gantz vnd
deutlich
sprechen/ Decalogum, Symbolum, precationem Dominicam,
Vnd die
Grossen sol man weiter fragen im Catechismo/
Quot sint Personae diuinitatis. Quid sit Lex. Quid Peccatum. Quid
euangelium.
Quid Poenitentia. Quomodo homo
accipit
remissionem peccatorum. &c. vnd sol erstlich befohlen
werden/ das
ein gleicher Catechismus durchaus im Lande gebraucht werde/ Nemlich für
die
Jüngsten/ Lutheri Catechismus. Wenn aber die Knaben etwas erwachsen/
vnd man
jnen weiter erklerung von den Artickeln Christliches Glaubens fürhalten
wil/
mag man Philippi Melanthonis lateinischen Catechismum an die hand nemen.
Vnd dieselben
tage sol man den Knaben ein Lectio aus Göttlicher [Bl.151
r] Schrifft exponiren Am Mitwoch Mattheum, oder Prouerbia
Salomonis. Am Sambstag die erste Epistel ad Timotheum, oder die Epistel
ad Colossenses,
oder ein gemeinen Psalmen. Als/ Miserere,
De
profundis. Psalmum 1. Beatus uir. 2. Quare fremuerunt gentes. Psalmum
24. Ad re
Domine leuaui. Psalmum 33. Benedicam Dominum in omni tempore. Psalm.
126. Nisi
Dominus aedificauerit. Psal. 132. Ecce quam bonum. Vnd sollen
die
Schulmeister die Grammatica vleissig in derselbigen exposition
anzeigen/ vnd
die einige eigentliche meinung den Jungen deutlich sagen/ vnd nicht
frembde
disputationes einfüren. Die Jungen sollen auch dieser Psalmen etliche
auswendig
lernen/ jr Gebet darin zu vben.
Etliche
Schulmeister wöllen eitel heilige Schrifft lesen/ etliche gantz keine/
diese
meinung beide sind strefflich/ Sondern diese ordnung/ wie gesagt ist/
so man
trewlich Leren wil/ ist der Jugent nützlich.
Das
dritte heufflein/ sol man in den
grossen Schulen also machen/ das man die Knaben dazu wehlet/ die nu
zimlich
Grammatici sind.
In der stunde
nach Mittage/ sollen diese mit den andern in Musica geübt werden/ wie
zuuor
gesagt ist. Hernach sol man jnen die zwen tage/ Montag vnd Dinstag/
Virgilium
exponiren. Die andern zwen tage/ Donnerstag vnd Freitag/ etliche
auserlesene
Epistolas Ciceronis/ oder De
amicitia, De senectute,
oder
Salustium.
Am Abend/
Regulas Prosodie/ vnd etliche liebliche Poemata Ouidij de Ponto/ oder
Heroidas/
oder etliche Elegias Sabini/ oder Stigelij.
Morgens frü/
sollen dieselbigen Jungen/ wie es die zeit bringet/ Virgilium oder
Epistolas
Ciceronis exponiren/ vnd sol der Preceptor durchaus lassen Construiren/
vnd
auff jede Construction die Regel aus dem Syntaxi fordern/ Vnd sol sich
dieser
langwirigen erbeit nicht verdriessen lassen/ Sol auch etliche schwere
Declinationes vnd Coniugationes halten.
Darnach sol
man mit diesem dritten hauffen/ auch Repetiren [Bl.151 v]
Ethymologian vnd Syntaxin/ vnd sol jeder in sonderheit
die Regeln auswendig sagen. Diese Repetitio der Ethymologie vnd
Syntaxis ist
nötig. Es mögen auch die Schulmeister zu dieser stunde beide hauffen/
Secundam
vnd Tertiam Classem zusamen setzen/ das sie in dieser stunde semptlich
gehöret
vnd geübet werden.
Zu diesem
allem ist nötig/ das der Schulmeister selbs ein gewisser Grammaticus
sey/ Denn
was einer selbs nicht gelernet hat/ dazu hat er nicht lust/ vnd helt
die Jugent
nicht dazu. Er sol auch selbs mit den Schülern lateinisch reden/ vnd
die
Schüler dazu halten/ das sie vntereinander Lateinisch reden.
Alle wochen
sollen die Knaben aus dem dritten hauffen/ am Sontag lateinisch
Schrifften dem
Schulmeister vberantworten/ Episteln/ vnd Historien/ oder Vers. Vnd sol
der
Schulmeister den Knaben zu deutsch etliche schöne Historien dictiren/
die sie
hernach die wochen Lateinisch machen/ Als von Joseph/ von Samson/ von
Dauid/
vom verlornen Son/ Vnd aus andern Büchern/ von Vlysse/ vnd Polyphemo/
von
Hercule vnd Omphale/ von Cyro vnd Cambyse/ Vnd dem gestrafften Richter/
des
Haut Cambyses auff den Richterstuel spannen liesse. Von Mida der nicht
recht
vrteilt zwischen Apolline vnd Pan/ vnd wurdem jm seine Ohren in Esels
ohren
verwandelt etc. Vnd andere nützliche Geticht/ darin zu gleich die
Jungen die Sprach
vben/ vnd Historien lernen/ vnd viel erinnerung von Tugent mercken
mögen/ vnd
sollen die Schulmeister vleis thun/ das sie jnen selbs vorrath
schaffen/
solcher Historien vnd
geticht.
Vnd so die
Jungen jre Schrifft vberantwort haben/ sol der Schulmeister jnen
anzeigen/ wo
etwas vnrecht ist/ vnd die vnrechten wörter vnd Constructiones bessern.
Wo in Stedten
der Jungen so viel ist/ das man den
vierden hauffen machen kan/ aus solchen Knaben/ welche nu gewis
sind in
Etymologia vnd Syntaxi/ Diese sol man dieselbige Stunde lassen Regulas
Dialectices recitiren/ die sol der Schulmeister mit leichten nützlichen
Exempeln erkleren/ hernach sol man jnen fürgeben/ initia Rethorica.
Diese sol man
auch die wochen eine stunde lassen Regulas [Bl.
152r.] Grece Grammatice recitiren. Item/ den andern tag/ sol man
eine
Stunde zum Phocilide/ vnd hernach zum Hesiodo vnd Isocrate ad Daemonicum nemen.
Vnd sol der
Schulmeister bey der Grammatica beyweilen ein nützlichen Spruch den
Knaben
fürschreiben/ das jnen etliche wörter bekannt vnd gemein werden/ vnd
das sie zu
gleich die buchstaben recht formiren lernen. Vnd sollen die
Schulmeister vleis
thun/ das sie selbs auch rechte Buchstaben machen/ als solche Sprüche.
Homerus
spricht/ Betet lieben Kinder/ wir bedütffen alle Gottes/ .
Item/ Gott sihet alle werck/ vnd straffet vnrecht. Item/
in allen sachen sol dir Gott der anfang vnd das ende sein. Item/ böser
anfang/ bringt ein bös ende/ .Vnd andere dergleichen Sprüche/ Wie denn dieselbige
sprach/
sehr reich ist von allerley schönen Sprüchen. Vnd ist nützlich/ das die
Jugent/
von Kindheit bald solche reden viel höre vnd mercke/ denn sie sind
gemeine
Regel des Lebens/ die hernach zur tugend erinnerung sind/ Vnd ist ein
zier/ so
die sachen dauon wir reden/ auff solche Sprüche bequem gezogen werden.
Auch
helffen sie den Jungen im schreiben zur inuentio/ vnd ordenlicher/ vnd
zierlicher jre materien zu fassen.
Nu mag einer
hie sprechen/ der vbrige klugheit hat/ Diese Ordnung sey eitel
Kinderwerck/ Das
ist recht/ aber an diesem Kinderwerck/ ist hoch vnd mercklich gelegen/
vnd ist
ein grosse vorbereitung zu guter Zucht vnd Künsten/ Wenn die jungen
Leute im
Catechismo recht vnterwiesen sind/ vnd sind gewisse Grammatici worden.
In allen
Gebew ist hochnötig ein gut Fundament zu legen/ Also sol dieses
Fundament auch
nicht gering geacht werden.
Dieweil auch
ein guter Bawmeister dazu gehört/ sol befolhen werden/ wenn man einen
Schulmeister in vnserm Fürstenthumb annemen wil/ das derselbe zu
Zweibrücken
von Personen die dazu sollen verordnet werden/ zuuor examinirt werde/
vnd
zeugnus bringe/ das er zu solchem Ampt tüchtig sey.
So er nu zu
der Administratio der Schule tüglich erkant/ sollen jm folgende
Artickel
fürgehalten werden. [Bl.152 v.]
I.
Das
er die Schule/ so jm befolhen/ nach der vorgeschriebenen Schulordnung(
die auch
jm alsbald vbergeben/ oder jm abzuschreiben zugestelt werden sol) mit
allem
vleis anrichten vnd administriren wölle.
II.
Vnd
so darin die gelegenheit der Jungen etwas enderung erfordert/ sol er
dasselbige
nicht anders/ denn mit rath der Superattendenten desselben orts/ oder
der
Visitatorn fürnemen/ vnd hierin allein der Jungen nutz vnd fürderung
der Lere
bedencken vnd ansehen.
III.
Das er mit
den Schülern so etwas erwachsen/ latein rede/ vnd sie auch latein zu
reden
gewehne.
IV.
Das er mit eim
züchtigen/ Erbarn vnd nüchtern leben den Schülern ein gut Exempel
fürtrage.
V.
Das er
die Jungen/ so jres vnuleis oder bosheit halben strefflich befunden/
nicht aus
zorn/ mit poldern/ sondern gebürlich mit Worten oder Ruten straffe.
VI.
Das er in der
Kirchen kein andern Gesang oder Psalm singe/ denn wie jm von den
Superattendenten oder Pfarrherr befolhen wird.
VII.
Das er seine Trew gebe/ an eines Eydes stat/
vns als ein
getrewer Vnterthan gehorsam zu sein/ vnd vnsern auch des Landes nutz
mit allem
vleis zu fürdern/ Vnrath vnd schaden seines vermögens zu wenden/ zu
warnen vnd
zuuerhüten.
VIII.
Vnd so sich zur zeit seines Ampts vnd
inwonung ein jrrunge mit
jm/ vnd einem oder mehr vnsern Vnterthanen oder Hindersess zu trüge/
das er
darin bey vns/ oder in vnserm Richtszwang recht geben vnd nehmen wölle.
Wo deutsche
Schul sein/ mögen die jetzt erzelte Artickel doch Mutatis mutandis dem
Schulmeister auch aufferlegt werden.
Nota. Wo
Schulen Deutsch oder Lateinisch sind/ sollen die Pfarherr vnd
Kirchendiener
desselben orts schuldig sein/ die Schule in einem Monat/ auffs aller
wenigst/
ein mal zu visitiren/ man mag auch bisweilen von Oberkeit wegen
denselben
jemands zuordnen.
+ + + + +
|